وكيل سامسونج يرفض تغيير قطع في الهاتف ويتحدى العميل: “اتصل اشتكيني”.. ويلا امشي !!

يقول أحمد مصباح في رسالته لـ”تيك ريفيو” والتى سننشرها كما وردتنا : “لوسمحتوا عندي مشكلة مع توكيل سامسونج فرع الحجاز موظف اسمه م. ع، الموبايل بتاعي المقاومة الحرارية بتاعته باظت من حرارة الجو وروحت دريم 2000 قالي هيغيرلي فلاته الشحن بـ 250جنيه، فروحت التوكيل لقيت الموظف هناك كالمعتاد أي حد داخل يقوله موبايلك محتاج بورده.

لما جه دوري قلتله لأ أنا محتاج “فلاته” شحن بس، قالي: إحنا توكيل وده نظامنا كده مش بنغير قطع بنغير البورده كلها على بعض، قلتله إيه علاقة البوردة بسوكت الشحن !!!

قالي متزعلش هغيرلك الإتنين البوردة والسوكت، ولو مش عاجبك روح صلحه في محل تاني واتصل اشتكيني بخدمة العملاء قولهم م. ع رافض يستلم مني الجهاز ويلا امشي عشان فيه عملاء كتير وراك، فضلت قاعد وصممت اقابل مدير الفرع يقولي أنا المدير اللي هنا واتصل اشتكيني.

المهم فضلت كده ربع ساعه لغاية لما جه زميله فضل يتحايل عليه يقعد ساكت ويستلم مني الموبايل وقالي هدخله ليك فحص ونتصل بيك نقولك بالظبط هيحتاج إيه.

روحت البيت تاني يوم داخل اسال خدمة العملاء على الشات قالتلي زي في الاسكرين المرفقة انهم ردوا محتاج فلاته شحن بـ 550جنيه قلتلها ماشي موافق واعملي فيه شكوى باللي حصل وانه بينصب على الناس.

النهارده جاي اسال رد الشكوى ايه قالولي إن طلب الصيانة اترد عليه إني ادفع 6000جنيه تغيير شاشة وسوكت شحن وبوردة ولو معترض روح اشتكي في حماية المستهلك او تنظيم الاتصالات يفحصوه عندهم واحنا ملناش دعوة بدريم.

قلتلها حصل نفس المشكلة من 3 سنين في فرع المهندسين وكان الموبايل محتاج شاشة فقط والموظف كان عاوز يغيرلي بوردة ولما اشتكيت في حماية المستهلك عملها قالتلي ماشي روح اعمل شكوى عندهم.

انا سجلت شكوى في حماية المستهلك رقم 383527 وحابب احذر الناس لأي حد قبل ما يروح التوكيل يعرض جهازه على مكان ثقة برا، اي حد داخل بموبايله يقوله هغيرلك بورده كامله معندناش قطعه لوحدها لو عاوز القطعه بس شوف محل برا، ولما اشتكيته راح مزود عليه كمان الشاشة، الموبايل عندهم من 24/7 وانا كل ده متعطل ومش عارف اشتغل ولا اتواصل مع حد وطلعت عدة الأرضي استخدمها لغاية لما الموبايل يتصلح.