سرقة حسابات العملاء البنكية خطر يطارد أصحاب بطاقات الـ ATM.. حوار مع محتال
قادتنا الصدفة البحتة اليوم للتواصل مع أحد محتالي البطاقات البنكية، إذ أصبح سرقة حسابات العملاء البنكية خطر يطارد أصحاب بطاقات الـ ATM.
سرقة حسابات العملاء البنكية
البداية كانت رسالة وصلتنا اليوم الساعة 10.42 صباحًا، من رقم موبايل كما هو موضح في الصورة بالأسفل، تضمن محتواها: “عزيزي العميل لقد تم ايقاف حسابك البنكي مؤقتًا.. نرجو الاتصال بنا“.
لم نستغرق كثيراً في التفكير وقررنا قبل تسليم الرقم للجهات المختصة الاتصال به بدافع الفضول ومعرفة أسلوب ايقاعهم بالضحايا، وهل طريقتهم مقنعة فعلاً أم يسهل اكتشافهم.
فإلى نص ما دار بيننا وبين أحد قراصنة “حسابات العملاء” البنكية خلال المكالمة الهاتفية:
تيك ريفيو: “ألو……….”.
المحتال: “أيوه يا فندم “.
تيك ريفيو: “حضرتك بعتلي ماسدج من شوية بتقولي إن حسابي اتوقف.. ممكن أعرف مين حضرتك” ؟.
المحتال: ” أنا محمد الدسوقي، من خدمة عملاء البنك المركزي المصري، وكلمت حضرتك يا فندم عشان حسابك البنكي تم ايقافه النهاردة للأسف من البنك اللي انت فاتح فيه حساب، وأخطرونا نبلغ حضرتك عشان نراجع بياناتك لإعادة فتحه مرة تانية”.
تيك ريفيو: “بعد ما بينا علامات الخوف.. قولناله طيب هو مش المفروض البنك هو اللي يكلمنا ويتابع معانا” ؟.
المحتال: بثبات انفعالي وهدوء..” لا يافندم التعليمات الجديدة إن العملاء اللي حساباتهم بتقف بتتبعت للبنك المركزي وهو اللي بيتواصل معاهم بشكل مباشر عشان الحساب يتفتح مرة تانية واحنا اللي بنبلغ البنك يفتح الحساب مرة تانية، متقلقش احنا من البنك المركزي وبياناتك في أمان”.
تيك ريفيو: سألناه سؤال مباغت..” طيب تقدر حضرتك تقولي أنا فاتح حساب في أنهي بنك” ؟.
المحتال: بهدوء شديد أقرب للثقة طيب خليك لحظات معايا.. وفي أقل من 30 ثانية: “للأسف يا فندم حاليًا السيستم فيه مشكلة ومش ظاهر عندي كل بيانات حضرتك”.
تيك ريفيو: سؤال تاني من باب استكشاف ردود فعله.. ” هو ليه حضرتك بتكلمنى من رقم موبايل عادي مش من الرقم المختصر بتاع البنك المركزي” ؟.
المحتال: بصوت هاديء وثقة ذكر لنا الرقم المختصر بتاع البنك المركزي وقال “مش كل العملاء بنكلمهم من الرقم المختصر عشان عددهم كبير، وصعب نكلمهم كلهم من خلال الرقم المختصر،فبنضطر نتواصل مع بعض العملاء من خلال أرقام موبايل عادية.. هو حضرتك قلقان من إيه؟.. ممكن بعد ما نخلص المكالمة تكلم البنك المركزي تتأكد بنفسك”.
تيك ريفيو: “طيب إيه البيانات اللي حضرتك عاوزها بالضبط”؟.
المحتال: “محتاجين رقم الحساب وقيمته بالضبط عشان نتأكد إن مفيش أي حاجة حصلت فيه بعد التحديثات اللي تمت، وده سبب ايقاف حسابك مؤقتًا، كمان محتاجين نراجع بعض بياناتك زي رقم كارت الـ ATM المطبوع وعنوان المراسلات والفرع اللي تم فتح الحساب من خلاله.
تيك ريفيو: “شكراً جداً على وقتك.. أنا ها كلم البنك اللي فاتح فيه حسابي أتأكد منهم وأشوف حسابي اتوقف ليه.. وبعدين أرجع تاني لحضرتك”.
لم ينتظر المحتال انتهاء المكالمة وبادر بإغلاق الخط بعدما باءت كل محاولاته في اصطيادنا بالفشل، في المقابل قمنا فور انتهاء المحادثة بإبلاغ الجهات المختصة التى تولت الأمر .
موضوعات نرشحها لك:
كيف عوّضت فودافون عملائها عن انقطاع الخدمة ؟
مواعيد عمل فروع المحمول خلال شهر رمضان
